بقلم : محمد الهادي البديري
الثلاثاء 19/11/2024
ليوم الصباح في قهوة الحومة قاعد مع سي لمجد وسي لامين وسي الصادق وسي سالم… هوما قاعدين يتناقشو على مقابلة البارح في رادس بين تونس وغمبيا واحد يهاجم في قيس اليعقوبي وواحد يدافع عليه وأنا نحمّش فيهم باش يتعاركو
نحنا هكّاكا ودخل سي الصحبي الطبيب البيطري متاع الحومة
-صباح الخير يا جماعة
-صباح الخير يا دكتور
-هالخطى السعيد … كيف السبّة جيت بحذانا نهار الثلاثاء؟ في العادة نشوفوك كان نهار الأحد
-اليوم ماعنديش خدمة، جبت دهّان باش يدهنلي cabinet خلّيتو غاطس وجيت نعمل قهوة معاكم
قالّلو سي سالم: مرحبا بيك ياصحبي، أما بالله عندي سؤال عندي مُدّة نحب نسألهولك
-تفضل على مانعلم
-توّا كي الطبيب البيطري إللي كيفك يداوي العلالش ويروّح للدّار ياكل اللّحم… يتسمّى يأكل في Les Patients متاعو ؟؟؟
تنهّد الطبيب وقال: ياااااحسرة يا سالم، شكون مازال يخلط عليه لحم العلوش… راهو الكيلو 54د عندي عام ولّيت végétarien ماناكل كان الخضرة والمقرونة.. أما كان تستدعاني على مشوي مانقولش لا… هيّا خلّصلي القهوة على الفازة يا سالم… ههههههه
