بقلم : محمد الهادي البديري
الاربعاء 22-1-2025
صباحكم مِسك وعنبر
اليوم الصباح وأنا ماشي مع سي الصادق لقهوة الحومة تعدّينا لباتيسيري حنيفة باش ناخذو
croissant
… لقينا سي حمادي صلاّح العجالي يعارك في سُميّة إللي تخدم في الباتيسيري
-صباح الخير يا جماعة، شبيك منرفز يا حمّادي وعلاش تعارك في سُميّة؟
-نهارك أسمح يا حمّة، عطيتها عشرة لاف، خذيت كعبات كرواسون ورجّعتلي خمسلاف بياسة في عوض خمسلاف ورقة
-وشنية المشكلة؟ ماهو الخمسه آلاف بياسة هي نفسها الخمسه آلاف ورقة
-لا يا خويا، الخمسه آلاف بياسة قيمتها أقل من الخمسه آلاف ورقة
-منين ليك هالحكاية يا حمّادي ؟
-مافيبالكش يا حمّة إللي الخمسه آلاف بياسة قيمتها أقلّ على خاطرها ديما تخالط في بياسة الدينار ومئة مليم و ممكن الدورو أصل .. آما الخمسه آلاف ورقة ديما تلقاها مع ورقة بو عشرة و بوعشرين و بوخمسين كان لزم وناس بكري قالو
« وين تحط روحك تصيبها » والحُر مايخالط الأوباش وخُلطة الفلوس الصرف تطيح من القيمة
تلفّتت لسُميّة لقيتها تضحك بالشهقة وقلتلها: شُفت الخنّار متاع عمّك حمّادي؟ نحنا نقاسو فيه كل يوم في القهوة
تكلّم سي الصادق وقال لحمّادي هيا سي الشباب للقهوة وأنت باش تخلّص القهاوي
ملاّ حمّادي.. هههههه
