بقلم : محمد الهادي البديري
الاحد 22/12/2024
عندي مُدّة مامشيتش لقهوة الحومة.. من النهار إللي عمل فيه سي لامين
accident
في الطريق بين طبربة والأنصارين
مشيتلو مع الجماعة لسبيطار القصّاب ومن بعد للدار
وقت تحسّنت أحوالو اليوم الصباح تعدّيتلو للدار أنا وسي لمجد وسي الصادق وركّبناه في الكرهبة ومشينا مع بعضنا لقهوة الحومة
وماتتصوّروش علاء القهواجي قدّاش فرَح بينا
جابلنا القهاوي ودبّوزة ماء ورجع للكنتوار
نحنا مازلنا مابديناش الحديث وهو رجع بحذانا وقال
-فيبالكم آش عمل فتحي الدهّان؟
-هاك الليلة كثّرلها بالشراب ومن غدوة صبح راقد لنصف نهار وراسو يوجع فيه
طلبو واحد وقالّلو : إجري إجري يا رمزي راهو خوك عامل عركة ومتحامين فيه
قام فيسع وهو مدهشر بالنّوم وخرج يجري في الشارع حفيان وشادد سكّينة ويعيّط وينهم إللي ضربولي خويا
-قلتلو : ومن بعد يا علاء ؟
-قاللي: من بعد تفكّر إللي هو ماعندوش خو وزيد إسمو فتحي موش رمزي
لكلّنا تطرشقنا بالضحك وقالّو سي لامين: الله يتولاّك يا علاء
هذي أول ضحكة من نهار الاكسيدون متاعي
هههههه
