صباح الخيرات والبركات
اليوم الصباح بعد القهوة مشيت للمغازة العامة متاع الحومة باش نشري شويّة قضيات… لقيت على الأقلّ عشرة متسوّلين ومتسوّلات قُدّام المغازة « يَحلبو » في الحرفاء.. كلّ واحد بطريقتو… وحدة تقول « كمّلّي باش نشري حكّة حليب لولدي » وواحد يقول « ينوب عليك ربّي اعطيني دينار باش نِشري قضيات لصغاري » والآخر يلصقِك كيف التّنبري ويُطلق عليك مجموعة من الدعوات الصالحات: يرحم والديك اعطيني دينار، ينوب عليك اعطيني دينار، يشدّلك في صحتك اعطيني دينار، بجاه سيدي محرز أعطيني دينار
المهم دخلت لل أم جي بعد مجهود كبير وأخذ وردّ مع المتسولين… أنا مشيت باش ناخذ
panier
نحط فيه القضية،
وهبط عليّا رمزي عون
sécurité
في المغازة
-صباحك ورد وفل سي محمد
-صباح الخيرات والبركات رمزي الباهي، شنية أحوال بوك سي محمود؟
-لاباس سي محمد يسأل عليك الخير
نحكيلك آش صارلي البارح؟
-أحكي إن شاء الله خير
-البارح روّحت من الخدمة لقيت سناء مَرتي تبكي سألتها شبيك، علاش تبكي؟ قالتلي تتفكّر هاك الراجل إللّي جاء البارح يطلب في حويجة لله؟ قلتلها نتفكّرو، ونتفكّر زادا إللّي إنتِ عطيتو صحن لوبيا وبُرج طاجين وصحفة شُربة
قالتلي هاك الراجل رجع اليوم وعطاني كتاب « تعلّم الطبخ »… والله سي محمد شدّني
crise
متاع ضحك
-جاوبتو: يارمزي ظاهر فيها مَرتِك طبّاخة
division 4
هزّها بحذا أمّك تعلّمها الطبخ
راهو الطبخ موش كعور ودِز للأعور
-قاللّي : وكيف ماتقبلش تمشي بحذا أمّي؟
-قتلو: وقتها شمّر على ذراعك وطيّب أنتَ
توّا نحنا في وقت المساواة يا وليدي
خزرلي رمزي مليح وقال: برّا سي محمد أقضي على روحك.. أنا غالط نحكيلك
Toutes les réactions :
16Vous, Mohamed Chebbi et 14 autres personnes
