بقلم : محمد الهادي البديري
الاثنين 24-2-2025
صباحكم مزيان
ثلاثة أيام لتالي توفّى الممثل والمنتج الحبيب الشعري والد الممثل الأسطورة سفيان الشعري بطل مسلسل شوفلي حلً
سي الحبيب الشعري مثّل دور البطل في « الفجر » وهو أوّل فيلم تونسي بعد الاستقلال للمخرج الراحل عُمار الخليفي
وعلى ذكر المخرج عُمار الخليفي نتفكّر هاك العام قاعد في وتيل لنتارنسيونال في شارع بورڨيبة نعمل في حوار معاه لجريدة « الأخبار » وكان حاضر معايا عشيري وصاحبي الصحفي الكبير سي محمد الواد
من جملة ماحكالي سي عُمار أنّو مشى للزعيم بورڨيبة في بداية الثمانينات باش يعاونو ماديّا على إنجاز فيلم التحدّي، قال جبِد الزعيم دفتر الشيكات الخاص متاعو وكتبلو شاك بألف دينار وقالّلو برّا صرّف الشاك وأعمل الفيلم متاعك
خرج سي عُمار من بيرو الزعيم حزين عُرضو سي علالة العويتي مدير مكتب الرئيس، وقالو: آش عملت سي عُمار ؟ جاوبو: حتى شيء … بورڨيبة عطاني مليون .. مايكفيش حقّ الكاميرا .. قاللو سي علالة: بالعكس، برّا دور على رؤساء البنوك وورّيهم الشاك وتوا تشوف
يقول سي عُمار: عملت دورة على
(les PDG)
متاع البنوك وشركات التأمين .. وكلّ واحد نقلّو هذي مساهمة الرئيس في إنجاز الفيلم، وأنت قداش مساهمتك؟ وإذا بيه كل واحد يجبد دفتر الشيكات.. هذا خمسين مليون وهذا سبعين وهذا ميات مليون.. الحاصيلو الفيلم تعمل والشاك متاع بورڨيبة ماصرّفتوش
مُختصر الحكاية: إللّي سمّاك غناك … واحد إسمو يقعدو الناس يذكروه بخير عشرات السنين بعد مايموت، واحد يلعنوه وهو حيّ.. كيف ترامب متاع الاماريكان
Toutes les réactions :
1616
