نهاركم بنجور
عندنا عام بالضبط ملّي عملنا استشارة وطنية لإصلاح التعليم ولليوم ما ظهر شي وما تبدّل شي.. 3 وزراء تربية في عام وتعليمنا هو هو.. ويجيك وزير يعمل منشور يجرّم الساعات الخصوصية ويهدد ويتوعد بمجلس التأديب وبالعزل وحتى باللجوء للقضاء.. والباهي في الحكاية أن بلاغ الوزارة خرج منّا ومداهمات بعض مقرّات « لُوتِيت » بدات من هنا يا بوڨلب حتى منظمة الدفاع عن المستهلك الساكتة على أسعار البطاطا والدجاج عاملة بلاغ تدعو فيه المواطنين الإبلاغ على مقرّات ليتيد
أولا الحمد لله لا نقرّي إيتيد ولا عندي صغار مازالت تقرا.. لكن العوج ينطّق الحجر: يا سيدي ماهُو فمّا قانون ينظّم الساعات الخصوصية (ما تقرّيش تلامذتك.. والفوج ما يفُوتش 4 تلامذة.. ومقاييس مقر التدريس..) فعّل القانون وِلّي يخالف يتحاسب.. ثم يا أخي أنا ولدي ضعيف نحب نقرّيه باش يتحسن: تسألني…!! ولّا ولدي باهي ونحب نقرٌيه إيتيد باش يولّي ممتاز: تحكم فيّا…!!
يقوللهم: راهِي المحتويات والتوقيت ڨديمة وفاشلة وفي حاجة للمراجعة.. ولاخر يحكي على لُوتيت
السبت 16/11/2024
