بقلم : محمد الهادي البديري
الخميس 20-2-2025
اليوم الصباح في قهوة الحومة قاعد مع الشلّة نحكو على العركة والإتهامات المتبادلة إللي وقعت البارح بين دونالد ترامب رئيس أمريكا (الثور الهايج) وفلوديمير زيلانسكي رئيس أوكرانيا (الممثل والمهرّج الفاشل) وكيفاش فلاديمير بوتين رئيس روسيا طلع هو الرابح من إنتخاب ترامب في بلاد المَاريكان
نحنا هكاكا ودخل للقهوة كوبل: طفلة مزيانة وولد ظاهر فيه زوّالي.. هوما قعدو في الطاولة وجاهم علاء القهواجي وعطاهم كارطة
(menu)
تفضّل مَزمَازال آش نجيبلك؟ قالتلو: جيبلي كوكتال الغلّة هذا وزيدني فوقو
(deux boules de glace)
شكلاطة وبيستاش.. تكلّم صاحبها وقال: بقدّاش الكوكتال؟ جاوبو علاء: خمسطاشن دينار أكاهو… الطفل غصّ وسكِت قالو علاء: وأنت خويا آش نجيبلك؟ قالو: لا ماحاجتيش، توّا نعمل جُغمة معاها
كمّل علاء منهم وجاء بحذانا وقال: شُفتو كيفاش الطفلة تكسرلو في خلايقو؟ كان جات معايا مانشريلهاش أكثر من قهوة ديراكت في ڨوبلي
ههههههه … الخبرة تتكلّم
Toutes les réactions :
23Mohamed Chebbi et 22 autres personnes
