بقلم : محمد الهادي البديري
الثلاثاء 25-2-2025
صباحكم مزيان وبالفرحة مليان
اليوم الصباح في قهوة الحومة قاعد مع سي لمجد وسي الصادق وسي لامين وسي سالم نحكو على زيارة الرئيس قيس سعيّد نهار الاحد في الليل باش يتفقد تقدم اشغال إعادة تهيئة دار الثقافة إبن خلدون وساحة منجي بالي وساحة برشلونة، وبالطبيعة شيء يفرّح على خاطر دار الثقافة إبن خلدون هي معلم ثقافي كبير والزوز ساحات منجي بالي وبرشلونة إللي متلاصقين قعدو سنوات مهمّلين ومعاهم جنينة البساج وساحة
Jeanne d’arc
نحنا هكاكا ودخل للقهوة عبد الباسط وِلد سي الصادق، وبعد ماسلّم علينا تلفّت لبوه وقالّلو
– بابا نلقاش عندك 20 دينار
– اه ؟ والله ما سمعتك
– قتلك نلقاش عندك 30 دينار
– ياخي مش كانو 20؟
صاح سي لمجد وقالّلو: هاك تسمع يا صادق… علاش قلت لولدك ماسمعتكش؟ جاوبو سي الصادق وقالّلو: كلمة السوء سمّاعة يا لمجد خويا
هههههه
