بقلم: محمد الهادي البديري
الخميس 16-1-2025
صباحكم مِسك وعنبر
اليوم الصباح في قهوة الحومة قاعد مع الجماعة ودخل الشيخ الفرشيشي إمام الجامع
صباح الخير يا شيخ… صباح الخير يا جماعة.. قال سي لامين: جابك ربّي يا شيخ، نحب نحكيلك حكاية واعطيني رأيك… تفضّل سي لمين
البارح بنتي المعرّسة كلمت امها قالتلها اليوم حليت القجر و هزيت فلوس راجلي ومشيت شريتلو بيهم زوز كلاسط وزوز خلاعي والفلوس كانت شوية وإلي بقى شريت بيه خاتم ذهب وثلاث روب وزوز بيجامات وصباط وزوز صيكان وشوي ماكياج، المهم راهو من الصباح يعيّط عليّا.. قالتلها أمها يزّي مالغش عيّش بنتي بالك جاوه كبار على هذاكا تغشش اما ميسالش جيبهم لبوك وماتغشّش روحك.. آش قولك ياشيخ؟
قاللو الشيخ الفرشيشي وهو يضحك: ياسي لمين هاذم هوما الرجال بلّي تعمل معاهم مايعجبهمش ….ربي ينكد عليه كيما منكد على بنتك
ههههه… ضامر برشا سيدي الشيخ
