بقلم : محمد الهادي البديري
الجمعة 27-12-2024
اليوم الصباح في قهوة الحومة قاعد مع سي لمجد وسي الصادق وسي سالم
وربما أنّ الجماعة يحكو على جامعة كرة القدم وشروط الترشّح لرئاستها
تلفّتلي سي الصادق وقاللي: نحلف عليك يا محمد راك مافيبالكش بإلغاء شرط المستوى الجامعي لكل واحد يحب يشد رئاسة الفيديراسيون…
قُلتلو فيبالي سي الشباب، وسمعت إللي نهار السبت 21 ديسمبر إللّي نحنا فيه صوّتو جماعة الأندية على إلغاء شرط المستوى الدراسي بالنسبة لرئيس الجامعة والنائب متاعو
الجماعة هاذم يا صديڨ ماكفاهمش إللي كرة القدم متاعنا ولاّت كرة الفضائح والمهازل والظلم والعنف والرشوة والتحيل والتهريب والجهويات والشعارات السوقية والإفلاس الأخلاقي والمادي والهزائم المذلة، حابّين يزيدوها الجهل والأمية… يا خويا مادام وزير الرياضة ورئيس الحكومة راضين وماتكلّموش قال شنوّة ممنوع علينا التدخل في امور الجامعة رغم إللي نعرفو إللي ينجمو يتدخلو من غير مايشلّقو، مبروك للمطرودين من المكتب وإللي مافاتوش السيزيام هاو ولّى عندهم الحقّ باش يترأسو جامعة كرة القدم في تونس.. رغم إللي يقولو قاعدين يحضّرو في البلاصة لطارق ذياب.. لكن هذا مايبرّرش إللي صار.. على خاطر كانو ينجّمو يحطّو شرط المستوى الجامعي او أن يكون المترشّح لاعب سابق لكرة القدم ولعب في المنتخب الوطني خمسة سنوات على الأقل (مثلا) وتحصّل على لقب قارّي فردي ( أحسن مهاجم أو أحسن مدافع أو أحسن حارس مرمى أو كرة ذهبية.. )
لكن إلغاء شرط المستوى الجامعي من غير
garde-fou
معناها سيّب الماء على البطّيخ
Toutes les réactions :
6Salem Hamza et 5 autres personnes
