بقلم : محمد الهادي البديري
الخميس 6-2-2025
صباح السرور والحبور
اليوم الصباح في قهوة الحومة لقيت سي عامر مدير الكولاج يستنّى فيّا، صباح الخير يا حمّة… صباح الخير يا عامر.. شنية احوالك ؟ الحمد والشكر لله
فيبالك يا حمّة عملت جو على التدوينة متاعك على أم كلثوم… لكن ثمة معلومات ناقصة
قُلتلو هات يا عامر نوّرني
قاللي: فيبالك إللي أم كلثوم جات لتونس عام 1968 واستقبلها الرئيس الحبيب بورقيبة وعلّقلها اكبر وسام وحضر حفلتها وشاخ على مقطع « هل رأى الحب سكارى مثلنا » من أغنية الأطلال ووقت فاقت أم كلثوم عاودت المقطع 26 مرة
وقتها كان سُوم تذكرة حفل أم كلثوم مابين 20د و50د… وكان سُوم كيلو لحم العلّوش بنصف دينار… في هاك الوقت منحت الدولة بطاقات دخول مجانية لبعض الطلبة عن طريق اتحاد الطلبة
وبلغت مداخيل الحفلتين مائة ألف دينار وفي التاريخ هذاكا أطلقت بلدية تونس اسم أم كلثوم على أحد أنهج العاصمة.. إللي كانت فيه جريدة « الايام » متاعك
قُلتلو يعطيك الصحة على المعلومة لكن تعرفش شكون تلهى بالحفلة من الاوّل للآخر؟
قاللي: لا يا حمّة
قُلتلو: هو المرحوم خليفة السعدي.. هو إللي مشى للقاهرة وإستدعى أم كلثوم ونظّمم الحفلة بتكليف مباشر من الرئيس بورقيبة. .. وهو تكفل بتنظيم حفل أم كلثوم وتحويساتها في تونس حتى مغادرتها مطار العوينة في تونس
تعرفوش شكون الراحل خليفة السعدي يا عامر؟
قاللي: لا مانعرفوش
قُلتلو: هو صاحب مطعم السعدي في مدخل مدينة أريانة وهو أصيل حاجب العيون من ولاية القيروان
قاللي : ماتقلّيش هاك الرستوران إللي كُنّا نسهرو فيه؟؟
قُلتلو: هذاكا هو.. وبالأمارة مازلت نسالك فلوس آخر سهريّة.. ههههه
Toutes les réactions :
5Mohamed Chebbi et 4 autres personnes
