بقلم : محمد الهادي البديري
الخميس 13 -2-2025
صباحكم مزيان وبالفرحة مليان
اليوم الصباح في قهوة الحومة قاعد مع سي لمجد وسي الصادق وسي لامين نتناقشو في اكبر المواضيع العالمية كيف وقتاش يجيبو الروز للحوانت بالثمن القديم متاعو؟ ووقتاش تتوفّر الادوية الحياتية في الفارماسيات؟ ووقتاش تقوم البلديات ووزارة التجهيز وديوان التطهير بصيانة البالوعات باش الطرقات ماتولّيش بحيرات وقت تصب المطر
نحنا هكاكا ودخل الشيخ الفرشيشي إمام جامع الحومة للقهوة وقعد بحذانا وهو متغشش
-صباح الخير يا جماعة
-صباح الخير يا شيخ، شبيك متغشش ماهو لاباس؟
-مانيش لاباس، اليوم تأكّدت إللي فمّة تجارة الأعضاء في تونس
-صلّي على النبي يا شيخ منين طلعت بيها هالحكاية؟
-صلّى الله عليه وسلم.. أنا عندي الدليل
-هات اعطينا
-البارح مشيت لحامد الدجّاج وشريت من عندو دجاجة مذبوحة لكن مالقيتش فيها الكبدة، هذي موش تجارة الأعضاء ولاّ أنا غالط
-تطرشقنا بالضحك وقلنالو: مطلعك في الطلالع .. يا علاء جيب قهوة للشيخ
Toutes les réactions :
99
