بقلم سالم حمزة
الاثنين 3 فيفري 2025
نهاركم بنجورن
في عام 95 جانِي واحد مُقرّب و طلب منّي نسلّف صاحبُو مبلغ ماليّ يرجّعهُولي بعد نصف شهر و فُوقُو 500 دينار.. باختصار بعد محاولات جِيت نقول لا قلت إيه.. فقط اشترطت على السيد بعد نصف شهر يجِيب لي فلوسي في شِيك و ال500 كاش.. و تمت العملية و أقسم بالله ال500 لا وكّلت منهم عايلتي حتى باڨات.. صرفتهم سبهللا
باختصار: عام 96 كرِينا أنا و المرحومَان عبد الرزاق الغرايري و رضا اليعقوبي و واحد رابع قهوة في سيدي بُوعلي: الرابع قلِبنا و خسرت 3 ملاين.. عام 97 فُورد فييستا عمل بيها خُويا حادث وهو ظالم: الكرهبة مشات زيزي.. عام 98 و أنا خارج من حمام الشط يظربني تران السلعة: كتفي و ضلوعي تكسروا.. الكرهبة تغفصت (بعتها بمليون و 200 في اليهودية..) و تزيد الشمينو تخطّيني ب12 مليون و 800
عاد قلت للوالدة يرحمها: أنا حرّمت في 500 دينار هانِي خسرت أكثر من عشرين مليون و غيري يحرّم في الملاين و ربي ساترُو
رغم أمّيتها قالت لي: ربي يحبك.. خلّصت الفاتورة الأولى غالية باش تتُوب.. غيرك ربي يزيدلُو في الحرام باش ما يتُوبش
