مازال ضرب مُولى السانية

بقلم : سالم حمزة

الخميس 6-2-2025

فما ذيب و ثعلب متعدين بحذا سانية.. شافوا دجاجة تحت شجرة

الذيب قال الثعلب: برا كُولها

قالو الثعلب: حرام

قالو الذيب: كُول بَركا.. الحرام ماعادش يطيح في مُولاه.. يطيح في اولادو و أولاد أولادو

المهم نڨّز عمك الثعلب.. طُرطاف.. طربڨ عليه المنداف

و في لحظة بدات الكلاب تشلتت فيه

خزر للذيب و قالو: موش قتلي الحرام يا من عاش تو يطيح في اولادي ولا احفادي

قالو عمك الذيب: وين نعرف.. لعل بُوك ولّا جدودك عاملين الشر و اليوم طاح فيك انت.. ماني قتلك يطيح في الأولاد و الأحفاد

و في رواية أخرى: مازال لك ضرب مُولى السانية

بحيث الواحد وقت يشوف المشهد الثقافي و الإعلامي و الرياضي يقول: ربي يهدي جدودنا: لابد عملوا حاجة خايبة طاحت فينا