بقلم : محمد الهادي البديري
السبت 18-1-2025
البارح الجمعة 17 جانفي يقوم سي مدير سبيطار ساقية سيدي يوسف يدغر فرمليّة ويزيد يصُبّ الإيسانس على شيفور ويشعّل فيه النار (شوفو هاك المستوى متاع مدير في عهد العلوّ الشاهق) والسبب حسب وكيل الجمهورية في الكاف هو أنّ المدير شكّ في الفرملية والشيفور إللي هوما قالو لمرأة تخدم معاهم باش تشكي بالمدير من اجل التحرّش
تعمل هكّا وزارة الصحّة وتخرّج بلاغ اليوم السبت 18 جانفي قبل الفجر (ماضي ساعة متاع الصباح) تستنكر فيه الواقعة وتوقّف مدير السبيطار على الخدمة وتزيد
Bonus
تعفي المدير الجهوي للصحة بالكاف.. علاش … ماندريش
بالله آش مدخّل المدير الجهوي في جريمة ارتكبها مدير سبيطار… ياخي هو إللي مدّلو السكينة وقالّو أدغر الفرملية ؟ ولا هو إللي جابلو بيدون الإيسانس؟ هذي هي يجيك البلاد ياغافل.. الراجل بعيد اكثر من خمسين كيلومتر على ساقية سيدي يوسف ويلحقو الطش
إذا كان وزارة الصحّة تعتبر أنّ المدير الجهوي مسؤول على منظوريه في كل شيء فأرجو من رئيس الجمهورية إعتماد نفس القاعدة واعتبار سي مصطفى الفرجاني وزير الصحة مسؤول على منظوريه ويقُلّو هات مفتاح الكرهبة ومفتاح البيرو وشِدّ دارك
ملاّ خُنّار يهبط علينا نهار السبت.. جاب ربّي عندنا فاش نتلهاو اليوم العشية باش ننسو الوضع متاعنا
سامحوني ماقلتش صباح الخير يا جماعة
Toutes les réactions :
31Mohamed Chebbi, Ahmed El Ghadhab et 29 autres personnes
